རྩེ་ཁོག་རྫོང་གིས་ཏང་གི་སྐབས་བཅུ་དགུ་པའི་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན་སྒྲོག་འགྲེལ་བྱས་ནས་དམངས་ཀྱི་བློ་ཁ་གཅིག་ཏུ་བསྡུས།
འཕྲིན་གཏོང་པ། དོན་གྲུབ་རྒྱལ། ཆོས་དར། སྟག་བྷ། གུ་རུ།
ཟླ12པའི་ཚེས6ཉིན་ནས་ཚེས9ཉིན་བར།རྨ་ལྷོ་བོད་རིགས་རང་སྐྱོང་ཁུལ་རྩེ་ཁོག་རྫོང་གིས་རྫོང་ཨུའི་གཅིག་གྱུར་བཀོད་སྒྲིག་འོག རྫོང་རིམ་པའི་མགོ་ཁྲིད་དང་། དར་དམར་དྲིལ་སྒྲོག་རུ་ཁག ཞང་དང་སྡེ་བའི་སྒྲོག་འགྲེལ་མི་སྣ་སོགས་རྩ་འཛུགས་བྱས་ཏེ་རྫོང་མངའ་ཁོངས་ཀྱི་ཞང་དང་གྲོང་རྡལ། དེ་མིན་སྡེ་བ་སོ་སོར་སོང་ནས་ཏང་གི་སྐབས་བཅུ་དགུ་པའི་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན་དང་ཏང་གི་ལོ་ངོ་བརྒྱའི་དམིགས་འབེན་གྱི་གྲུབ་འབྲས་གལ་ཆེན།ལོ་རྒྱུས་ཀྱི་ཉམས་མྱོང་སོགས་སྒྲོག་འགྲེལ་བྱས་པ་དང་། ལས་བྱེད་པ་དང་མང་ཚོགས་ཀྱི་བཞུགས་མོལ་ཚོགས་འདུ་བསྡུས་པར་མ་ཟད།ད་དུང་དམངས་ཀྱིས་སེམས་ཁྲལ་བྱེད་བཞིན་པའི་གནད་དོན་ལ་འགྲེལ་བཤད་བྱས་ཏེ་ཚང་འཛོམས་གྲོས་ཚོགས་ཀྱི་དགོངས་དོན་མི་སེམས་སུ་ཟུག་པར་བྱས།
རྩེ་ཁོག་རྫོང་བོན་རྒྱ་ཞང་དར་དམར་སྡེ་བའི་སྒྲོག་འགྲེལ་ཡུལ་དངོས་སུ། ཏང་ཡོན་རྒན་པ་རྣ་བོ་ཡིས་བཤད་རྒྱུར།“ཐེངས་འདིར་བོན་རྒྱ་ཞང་རྟ་ཐོག་སྒྲོག་འགྲེལ་རུ་ཁག་གིས་དཀའ་ཁག་ལ་མ་འཛེམས་པར་འགྲིམ་འགྲུལ་ཅུང་སྟབས་བདེ་མིན་པའི་ཁྱིམ་ཚང་རེ་རེའི་སྒོ་ཁར་ཡོང་ནས། ཏང་གི་སྐབས་བཅུ་དགུ་བའི་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན་སྒྲོག་འགྲེལ་བྱས་པ་འདིས་ཞང་ཏང་ཨུ་དང་སྲིད་གཞུང་གིས་ནམ་ཡང་ང་ཚོའི་མང་ཚོགས་ལ་ཐུག་ཁུར་བྱེད་པ་མཚོན་པས་ཧ་ཅང་ཡིད་དགའ་བ་ཞིག་རེད”ཟེར།
རྩེ་ཁོག་རྫོང་ཧོར་གྲོང་རྡལ་གྱིས་ཆེད་དུ་བུད་མེད་མཉམ་འབྲེལ་ལྷན་ཚོགས་ཀྱི་བུད་མེད་སྒྲོག་འགྲེལ་རུ་ཁག་རྩ་འཛུགས་བྱས་ཏེ་རྒན་ཚང་དང་བུད་མེད་མང་བའི་ཁྱིམ་ཚང་དུ་སོང་ནས་ཏང་གི་སྲིད་ཇུས་སྒྲོག་འགྲེལ་བྱས། ཧོར་གྲོང་རྡལ་ཧོར་སྡེ་བའི་བུད་མེད་འབུམ་མཚོ་ཡག་གིས་བཤད་རྒྱུར།“ཐེངས་འདིར་ཧོར་གྲོང་རྡལ་གྱིས་ཆེད་དུ་བུད་མེད་སྒྲོག་འགྲེལ་མི་སྣ་རྩ་འཛུགས་བྱས་ཏེ་ང་ཚོ་ཁྱིམ་ལས་ལ་བྲེལ་བའི་སྡེ་བའི་བུད་མེད་རེ་རེའི་མདུན་དུ་ཡོང་ནས་གོ་བདེ་ཞིང་ནང་དོན་གསལ་བའི་སྒོ་ནས་གྲོས་ཚོགས་ཀྱི་དགོངས་དོན་སྒྲོག་འགྲེལ་བྱས་པས་ཧ་ཅང་སེམས་འགུལ་ཐེབས་ཡོད”ཟེར།
དེ་ལས་གཞན་སྒྲོག་འགྲེལ་བྱ་འགུལ་སྐབས་སུ། རྩེ་ཁོག་རྫོང་སྨྱན་སྦྱོར་ལྟེ་གནས་ཀྱིས་ཏང་གི་ལོ་རྒྱུས་ཤེས་བྱའི་སྐོར་གྱི་དྲིས་ལན་འདེབས་པ་དང་རྒྱང་སྒྲོག་བརྙན་འཕྲིན་དང་འཕྲིན་སྟེགས་སོ་སོ།འཕྲལ་བསྟུན་རྒྱང་སྒྲོག་སྒྲ་དུང་སོགས་ཀྱི་བྱེད་ཐབས་སྤྱད་ནས་གྲོས་ཚོགས་ཀྱི་དགོངས་དོན་བརྒྱུད་སྒྲོག་བྱས་པས་རྩེ་ཁོག་ས་ཆའི་རྒྱ་ཆེའི་ཏང་ཡོན་མང་ཚོགས་གྱི་ཏང་གི་ལོ་རྒྱུས་རྨང་གཞིའི་ཤེས་བྱ་སྔར་ལས་སྲ་བརྟན་དུ་བཏང་བ་རེད།།
青公网安备 63232102000018号
